Friday, August 17, 2007

رباعيات جاهين بمناسبة التمانية و عشرين


يااااه

بقالك كده في الدنيا تمانية و عشرين سنة بالتمام

كل الفترة ديه عمّال يا قلبي تدق , يا ترى فاضل كام دقة و تقف ؟

يا ترى إيه اللي اتعلمته في السنين ؟ و إيه سبب الحنين ؟

إيه سر قوة دقتك على الرغم من الحزن الموجود جواك ؟ و الحزن ده جيه منين ؟

على العموم كل سنة و أنت ... حي

و هديتي لك كلمات كنت تبحث عنها و وجدتها لك عند جاهين , بعض الرباعيات التي تعبر عن حالك بعد التمانية و عشرين

اسمع يا عمّي و قول عجبي

------------------------------------------------
مركب ورق من نفخة تتطوح

ركبتها و الكل بيلوح

سوّحت فيها ( تمانية و عشرين ) سنة

للآن ... و لا بتغرق و لا تروّح

------------------------------------------
إيه اللي خدته من مرور السنين

يا قلبي إلا دمعتك و الأنين

بتئن و بتفرح و ترجع تحن

مع إن مش كل البشر فرحانين

------------------------------------------------

و لو انضنيت و فنيت و عمري اتفرط

مش عاوز الجأ للحلول الوسط

و كمان شطط و جنون مانيش عاوز

يامين يقول لي الصح فين و الغلط ؟

------------------------------------------------

أنا الذي عمري اشتياق في اشتياق

و قطر داخل في محطة فراق

قصدت نبع السم و شربت السم

من كتر شوقي و عشمي في الترياق

------------------------------------------------

تسلم يا غصن الخوخ يا عود الحطب

بيجي الربيع ... تطّلع زهورك عجب

و انا ليه بيمضي ربيع و بيجي ربيع

و لسه برضك قلبي حتة خشب

------------------------------------------------

ياما صادفت صحاب ما صحبتهمش

و كاسات ( عصير ) و شراب و ما شربتهمش

أندم على الفرص اللي أنا سبتهم

و الا على الفرص اللي ما سبتهمش

------------------------------------------------

إيش تطلبي يا نفسي فوق كل ده

حظك بيضحك و انتي متنكده

ردت قالت لي النفس : قول للبشر

ما يبصوليش بعيون حزينة كده

------------------------------------------------

أنا شاب لكن عمري ولا الألف عام

وحيد و لكن بين ضلوعي زحام

خايف و لكن خوفي مني أنا

أخرس و لكن قلبي مليان كلام

------------------------------------------------ عجبي


ملحوظة : الكلمات بين الأقواس محرفة

26 comments:

عصفور المدينة said...

لسة بدري
أطال الله بقاءك وأمتعنا بحواراتك مع نفسك
Long Life the King

FAWZYYYYYYY said...

ان باقول 28 الف سلام عليكم
و 28 الف مرحبا
و 28 الف مبروك
و نفسي أكتب 28 ألف تعليق
أو تعليق مكون من 28 ألف كلمة
بس انت طبعا متأكد 28 ألف مرة ان انا مش هقدر
بي الحاجة الأكيدة
ان انا 28 ألأف المرات بحبك و باقوللك يا رب يديمها عليك عمر في طاعة
و نيجي بقي للتعليق
ايه يا باشا ده انت لسه مدخلتش دنيا
و بعدين انا كنت بافرح لمل اقرا مدونتك
انهارده انت خليتني اتغم
يا بشمهندس ربنا يديلك طولة العمر فى طاعته
و بعدين ما في ناس تانية داخلة أو عدت ال82 ومكملة المشوار بينا
و كلنا نفسنا قلبها يبطل دق بس لسه بيدق
قدرنا بقى هنعمل ايه
و بحبك يا ريس

Ahmed Ismail said...

السلام عليكم و رحمة الله و بركاته
بمناسبة ذلك الحدث اهديك تلك الدعوات
بارك الله لك فيما ماضي من عمرك و جعله نورا في صحيفتك.
و زادك الله من فضله و اعطاك الصحة فيما بقي و جعلك سببا لنصرة دينه و رزقك شهادة في سبيله.

بالمناسبة متي سنتقابل يوم الجمعة؟

SHAHEENSHY...فوضى منظمة said...

كل سنة وأنا طيب .. يا أنا .. أخوك الصغير

أدهم said...

بارك الله فيما مضى
و رزقت التوبة قبل الردى
و نورا وشهادة في سبيل الهدى
يا حبا في القلب .....ما كان له ان ينقضي.
أخوك أدهم

Farag said...

غفر الله لك مامضى من الذنوب والزلات .. وبارك لك فيماهو ات.. وجمعك مع عروسه اسمها .. ايات .... واذا كان معك فلوس هات ياشربات..

FadFadA said...

عصفور المدينة
ربنا يكرمك و ما يحرمنيش من زقزقتك
:)
محمد

FadFadA said...

ميدو فوزي
و أنا بأقول 28 ألف عليكم السلام
و 28 ألف منور المدونة
و 28 ألف يبارك فيك
و الحمد لله انك ماكتبتش ال28 ألف تعليق
و نيجي بقى للرد على التعليق
يا عم أنا دخلت الدنيا من 28 سنة
و بالنسبة لموضوع الغم , و الله ماكنشقصدي و أعتذر يا حماده , بش أصلها سنة خلصت و عدت , و بالتالي عمري نقص سنة
و بعدين ده سطر في التدوينة , إيه ماشفتش غيره , ده انت غريب
:)

مين اللي بتكلم عليه ده ؟؟؟
أنا ماعرفش حد بالوصف ده
على العموم بحبك يا رئيس جمهورية قلبي

محمد

FadFadA said...

أحمد اسماعيل
جزاكم الله خيرا على الهدية الجميلة ديه

نتقابل بعد المغرب ان شاء الله

محمد

FadFadA said...

أدهم
أشكرك يا حبيبي على الدعوات الجميلة ديه
واحشني
محمد

FadFadA said...

هندزة فرج
إيه ده ؟
إنت بتقول شعر يا بهجت ؟

و اشمعنى آيات !؟ مش ممكن تخليها آية واحدة كفاية

و منورني يا عمي و ربنا ما يحرمني منك يا هندزة

محمد

FadFadA said...

فوضى منظمة
مش عارف أقول حاجة غير بحبك
أنا

dead man said...

كل سنة وانت طيب يا جميل

(f)

AbdElRaHmaN Ayyash said...

:D و انا بقول يا محمد؟
المفروض اقول يا استاذ محمد
يا عمو محمد
دول عشر سنين يا عم :D
ربنا يبارك فيك يارب
ألف مبروك يا سيدي
و كل سنة و انت طيب و ربنا يوفقك ياارب في اللي جاي و ينفع الدنيا بيك
سلاامو

Hadota .. حدوتة said...

كل سنة وانت طيب
الرباعيات تحفة
وانت مدونتك جميلة

مع اول مرور ليا عهليها بسجل اعجابى
واتمنى اكون صديقة البرنامج

قصدى المدونة
:)
تحياتى

Anonymous said...

جامدين اوى علشان لمست حاجة جوايا زى ما قولتلى و عجبى

belbesy said...

كل سنه وانت طيب

عبدالرحمن رشوان said...

كل عام وأنت بخير حال
وأتمنى من الله أن تعود أيام الصفا
وأعتذر إليك أخى إن كنت قصرت فى حقك
أخوك
عبدالرحمن

FadFadA said...

dead man
و انت أطيب يا حبيبي
:)
سعدت بمحادثتك كثييييييييرا

محمد

FadFadA said...

عبدالرحمن
يا عم خللي البساط أحمدي و قول اللي تقوله
أهم حاجة ماتحرمنيش منك
محمد

FadFadA said...

حدونة
أشكرك على كلامك
و أشكرك على زيارتك
و أنت بالفعل صديقة للبرنــــ... المدونة

FadFadA said...

مجهول
مش فاكر انا قلت كده لمين ؟
اممممممم
متهيألي قلت كده لمحمد فوزي
بس مش متأكد
على العموم كويس ان الكلام بيحرك حاجة جوا

محمد

FadFadA said...

بلبيسي
يااااااه
حمدالله على السلامة
كل ده غياب !؟
و انت طيب يا حبيبي
محمد

FadFadA said...

عبدالرحمن
هي الأيام ماراحتش علشان تعود
و بعدين تقصير إيه اللي انت قصرته !!!؟؟؟؟
انت لسه مصمم !؟
صدقني انت لم تقصررررررررررررر
أحلفلك يعني ؟

اصرار أمل said...

كل عام وأنت أصفى وأنقى ...
وبارك الله فى عمرك ومده لك على الطاعة ...

FadFadA said...

اصرار أمل
بالفعل , دائما زيارتك تشرفني
و أشكرك على دعائك