Thursday, January 15, 2009

ساعات متكررة في حياة زوج حديث ... مش أنا

ملحوظة قبل البداية : اللي مش متجوزين يمتنعوا






يا فتاح يا عليم يا رزاق يا كريم
صبحنا و صبح الملك لله


يرددها بمجرد أن يفتح عينيه , ينظر إلى من تنام بجانبه – و هي بالمناسبة زوجته – يتأمل وجهها المنتفخ من كثرة النوم و شعرها الثائر حول رأسها كأنه آلاف من أشعة الشمس المحترقة تتجه في كل صوب و نحو لتضيء أركان الغرفة فلا تمكنه من رؤية أي شيء , و ينظر إلى المساحة التي سيطرت عليها من المرتبة حتى لم تبق له إلا مساحة يستطيع أن ينام عليها بالجنب


ينزل من على السرير و هو يبحث بقدميه عن ( الشبشب ) فلا يجد إلا ( فردة ) واحدة يرتديها و يمشي و هو ( يزك ) على القدم الأخرى و يتحرك نحو هدفه و هو مشوش الفكر , لا يكاد يرى ما أمامه و يظن أنه قد نال بجدارة لقب ( كفيف ) مع مرتبة الشرف
بعد عدة صدمات في كرسي ( التسريحة ) و ( جنب ) السرير صاحبها عدة تأوهات نتيجة ( خبطة ) في ركبته و كدمة في ( صباع رجله الصغير ) يصل إلى مراده , يفتح الباب و يدخل بقدم التي يظن أنها الشمال – التي بها الشبشب – حتى يصل إلى مبتغاه ... يرفع الغطاء ... يجلس ... ثم بعد فترة بها بعض المعاناة يتنهد تنهيدة الخلاص و التي تدل على راحة عارمة ... يقوم بعد أن استرد بعض وعيه و ضوء عينيه و يضغط على ( الزر ) ليسمح و يسمع صوت انهمار الماء متدفقا
يتوجه إلى الحوض بجانبه و يفتح ( الحنفية ) فينزل الماء ( الساقع ) ... ينظر إلى السخان ليتأكد من أنه شغال ) فيكتشف أنه في وضع العمل و لكن الشعلة مغلقة بسبب أن ( الأنبوبة خلصت ) ... يشعر بحموضة شديدة لا ينفع معها أي ( رايب متربرب ... جهينة ) 0
ينظر في المرآة محاولا أن يتناسى ( سقوعية ) الماء محدثا نفسه
إيه اللي انت عملته ده !؟؟ مش كنت كويس في بيت أمك !؟؟
كتير نصحوك ( إنت كده تمام ) ... ( بلا جواز بلا وجع دماغ ) ... ( ده إنت كده ملك ) 0
و كم كنت تقابل أصدقاء سبقوك بهذه الجريمة و كان ينظر أحدهم إليك بتحسر و هو يقول ( يابختك ) ثم يكمل ( يا عم عيش حياتك ) 0
ممكن أعرف ليه ماعشتهاش !!!!؟؟؟؟؟؟؟؟
فلا يجد إلا أن يقنع نفسه بأنه قرار كان لا بد منه و قد أخذه و هو بكامل قواه العقلية و عليه أن يتحمل عواقبه
يخرج بعد أن تجمدت أطرافه و أصيب بصدمة عصبية حادة نتيجة ( سقوعية ) الماء و يرتدي ما تيسر من ملابسه و ينزل مسرعا قبل أن تقوم زوجته و ( يتصبح ) بوجهها – بالطبع حتى لا يصبح اليوم ( حلوا ) زيادة عن اللزوم – فقد منعه الطبيب من الحلو



يخرج من باب شقته متسللا و يسرع بركوب الأسانسير و بمجرد خروجه يجد أن البواب قد كمن له ( عمل كمين ) قائلا

فين إيجار الشهر المتأخر ؟ و 50 جنيه للأسانسير و السلم و فيه 75 جنيه لزوم شوية تصليحات في العمارة و 20 جنيه ( علشان العربية ) و يا ريت بعد كده تتأكد من إغلاق باب الأسانسير وراك
و قبل أن يرد ختم البواب كلامه
انهارده فيه اجتماع لسكان العمارة يا ريت متتأخرش ... سامع
و بعد ( زغرة ) قوية – من البواب و ليست منه - ينصرف
بعد أن يسمع التعليمات من البواب يذهب إلى سيارته فيجد من أتلفها من جنبها بمسمار على سبيل الذكرى ... كان يريد أن يكلم البواب و لكنه خشى هذه المرة أن يتلقى صفعة على وجهه – من البواب و ليس منه ... و هو يعلم أنه لن يستفيد بأكثر من قوله : و هو مطلوب مني أسيب اللي ورايا و أحرس عربيتك !!؟
يصل إلى عمله بعد مغامرات في شوارع القاهرة المحروسة مع قراءة الكثير من الحكم على الميكروباصات و سيارات النقل زادته صبرا و تماسكا
يقيني بالله يقيني ) ( يا بركة دعاكي يا أمي ) ( المجروحين يمسكوا يمين ) ( ماحدش فاهم حاجة ) ... ( 1 + 1 = 3 ... مفيش ضمير ) ( لا افتخار و لا غنى .. ديه من ربنا ) ( للبيع عشان ترتاحوا )... و أخيرا ( بتبص على إيه يا عبيط )
يصل إلى مكان عمله و يركن سيارته مع بعض ( الخبطات ) تحت رعاية سايس الموقف مع تمنياته بمزيد من الاصلاحات


يدخل مكتبه فيجد مديره بانتظاره و على وجهه كل علامات القرف – مديره و ليس هو
اتأخرت ليه ؟
الدنيا زحمة ... حضرتك
زحمة , أقعد في بيتكم
ماشي
ماشي إيه ؟
هاقعد في بيتنا ... انهارده هاخده عارضة
ماعندكش رصيد أجازات
خلاص خصم
يومين
عليا بتلاتة
و ينصرف من أمامه قبل أن يتهور – بالطبع مديره و ليس هو – و يأخذ ( بعضه ) و يعود إلى بيته و يدخل غرفته فيجد زوجته مازالت نائمة _ متى تكون مستيقظة ؟؟؟ سر لم يكتشفه حتى الآن – يدخل تحت ( البطانية ) بهدوء فتنتفض زوجته منزعجة و هي تنظر إليه
إيه ده !؟ إنت لسه نايم ؟ ... قوم إتأخرت على الشغل ... و سيبني أنام شوية
... يغمض عينيه دون أن يجيب و هو يردد : شوقا لأيام الصعلكة و يخلد إلى النوم

27 comments:

Anonymous said...

السلام عليكم ورحمة الله وبركاته
كيف حالك يا هندسة ؟ واي أخبارك ؟
بعد طوووووووووووووول غياب
رجعتلك مرة تانية اهوه
يمكن عشان اتجوزت ؟ يمكن كنت في الأول بحس انك قريب فلما احب أشوفك مش هتبقي صعبة أوي ؟ يمكن.... !
يسعدني ويشرفني اني اكون أول من يعلق علي هذه المدونة التي تصف مأساة المتزوجين :D
بس هي الدنيا كده, مفيش حلاوة من غير نار ... وان كنت انا شايف ان حلاوة الجواز هي ناره (عارفني انت يا هندسة بحب الخناق والرغي الكتير) :D
بس عندي سؤالين ...
هو المفروض فردة الشبشب التانية راحت فين ؟؟
هو التصرف مع المدير كده علي طول ولا ليه علاقة بالجواز ؟؟
مش عارف ليه انا حابب اسيبك تفكر شوية انا مين :D:D
وعلي رجوع قريب مرة اخري بإذن الله
والسلام ختام

soso said...

السلام عليكم يااخ محمد
اولا نا رخمت وبرضوا قرييييت مع انى مش مطابقة للمواصفات
****
بجد حرام عليك بالرغم من انى بقالى كتير بدخل مش بلاقى حاجة بفرح واقول اكيد الزواج اخدك مننا ومش بقيت تفضفض لنا
وبكدة ارتحنا من مجنون وعقبال الباقى
ههههههههههه
*****
معلش يااستاذى الكلام كلة حلو جدا لانى عكستة
لقيتك سعييد
اضحك الله سنك يابشمهندس

Aml Ghonaim said...

الله المستعااان !!!
يعني كل دي غيبة ؛ وفي الآخر شكوى !!!
طيب على أساس ان دي بعض الساعات المتكررة .. أين بقية الساعات ؟
!!!
آخر ما أتذكره أن النساء هن ( يكفرن العشير ) لا الرجال !!!
أسعد الله أيامكما ؛ وهنأكما بحياتكما ..
ولو انها متأخرة : بارك الله لكما وبارك عليكما وجمع بينكما في خير ...

FadFadA said...

و عليكم السلام و رحمة الله و بركاته
أولا : هذه ليست مأساة متزوج , بل هي مجرد ساعات متكررة
ثانيا : تصرف المدير ماكنش بيفرق معاه الأول بس دلوقتي هو مش مستحمل عشان كده العلاقات ساءت بينهم
و بالنسبة للشبشب , لغاية دلوقتي مالقهوش
انا متهيألي عرفتك , و في انتظار رجوعك للتأكد
ملحوظة : أنا موجود على طول و الوصول ليا سهل جدا و مافيهوش صعوبة
في انتظارك
:)

FadFadA said...

soso
كان نفسي ماتقريش غير بعد ما تقدمي على الخطوة ديه
بس على العموم ديه مجرد شوية عكوسات خفيفة ما بتحصلش لكل المتجوزين

نورتيني

محمد

FadFadA said...

اصرار أمل
لم يرد ذكر بقية الساعات حتى لا يصاب أحد بالكآبة
فاكتفى بذكر الساعات الجيدة في يومه
:)

محمد

Anonymous said...

السلام عليكم و رحمة الله و بركاته

عود أحمد يا بشمهندس محمد و عقبال ما ربنا يرزقك بعبد الرحمن
و يكون محمود فى الأرض و السماء
و ساعتها لما تشوفه تقول يا فوزى بك يا ولدى

واحشنا والله يا هندسه
أنا طبعا قريت التدوينه
أكتر حاجه عجبتنى فيها
عارف إيه
طب متوقع إيه طيب
؟
؟
؟
وصلت ولا لسه
هأقولك يا سيدى
أكتر حاجه عجبتنى فيها
((مش أنا ))
حسيت إنك لأ بجد راجل زينا
كده انت كتاباتك كلها فيما بعد هتخضع للرقابه
للأسف يا هندسه
فقدت مصداقيتك
ربنا يسعدك يا رب
أكيد عرفت أنا مين طبعا
مش محتاج أقوللك

FadFadA said...

و عليكم السلام و رحمة الله و بركاته

"ربنا يرزقك بعبد الرحمن"
"و يكون محمود فى الأرض و السماء"
و ساعتها لما تشوفه تقول يا فوزى بك يا ولدى

إمممممممممم ؟
مش عارف أحدد مين بالظبط !!!!!؟
ممكن تكون مدحت !؟
صح ... أكيد مدحت
وحشني جدا جدا جدا
يبني إمتى هتيجي ؟؟؟؟؟

أنا قلت " مش أنا " لأنه ببساطة مش أنا بجد
يا باشا إحنا رجالة و هنفضل طول عمرنا رجالة و مفيش حد يقدر يأثر علينا , حتى لو كان مين
ملحوظة : مراتي بتقرأ التدوينةو لا تقرأ التعليقات
وشكرا

محمد

Fahd said...

ههههههههههههههههه

هداك الرب الاله

ايه ياعم ده

اضحك الله سنك ضحكتني

الف الف مبروك

والله لم كنت اعلم كنت حضرت

بارك الله له وبارك عليك

اكيد اكيد زوجتك ملهاش في النت والا كنت اتكلم بحرية اكتر من كده
انا عايز اتجوز ياعم انت هتحبطتني ليه


علي فكره افظع حاجه موضوع الكدمه في صباع رجلك الصغير بتبقي صعبه جدا وخصوصا في البرد


اتمني ان اراك علي خير

كويس انت تعرف شاهشني

كده المسافه قربت

Anonymous said...

هندسة ازيك
انا كده اطمنت عليك
و ربنا يستر
ربنا يعينك
:)
وحشنى اوى و الله و نفسى اشوفك
سلاااااام
أخوك /
أحمد سنوسى

أنسانة-شوية وشوية said...

السلام عليكم ورحمة الله وبركاته

ايه يا محمد ده يعنى المفروض بعد طول الغياب والزواج الاقي التدوينة دى مش اللي كنت منتظراها بجد وخصوصاً انها ساعات متكررة مش هى الاستثناء امال الاستثناء يبقي ايه

FadFadA said...

fahd
إوعى تحبط
ده هو كاس و داير
و صدقني هي شكة دبوس
وهوب ... تلاقي نفسك زوج حديث
و تتكرر الساعات
:)

لأ ... بجد الزواج جميل
ربنا يرزقك و ييسر لك

انت تعرف شاهنشي ؟

محمد

FadFadA said...

سنوسي الصغير
وحشك ؟؟؟
طيب ما انا موجود
اتصل يا ندل
مستني منك زيارة
سامع

محمد

FadFadA said...

انسانة شوية شوية
و عليكم السلام و رحمة الله و بركاته
الاستثناء مردتش أقوله عشان محدش ياخد فكرة وحشة عن الزواج
:)

انتظري التدوينة الجاية
أظن هتكون اللي كنت مستنياها

محمد

Anonymous said...

ياااااااااااا عودا احمد
مع اني مش متجوزة و لكنني لم استطع منع نفسي من قراءة التدوينة, بقي ياراجل كل دا بعد مرور اقل من شهرين علي زواجك امال لما تكمل بقي ....... هاتعمل اية الله يعينك, اه ما تنساش تبقي تغير الانبوبة بعد ما تفضي, الف الف مبروك علي زواجك
Shimo

FadFadA said...

shimo
الله يبارك فيكي
عقبالك
طبعا الجواز ... مش اللي قي التدوينة
بالنسبة للأنبوبة ...الحمد لله الشقة فيها غاز طبيعي
:)
شرفتيني جدا

محمد

Hosam Yahia حسام يحيى said...

هههههههه
جميله المدونه

دمتم بخير :)

لى عوده ان شاء الله

Anonymous said...

ههههههههههههههه
إيه يا هندسة ده
ده انت لسة ما كملتش شهريين وبيتقول كدة ....امال بعد أول عيل هتعمل إيه
هتقولي ده مش أنا.... هأقول لأ يا أفندم أكيد 95% منه صح ...عقلك الباطن بقه

ربنا يكرمك.... وميضيعش ليك فردة شبشب أبدا..... و يا رب يدخلولكم الغاز

وبالنسبة للأسانسير.... يا رب يلغوا المفتاح عشان انا زهت من القصة بتاعته

اخر دعوة:يا رب جارك يعزل


كفاية كدة دعوات
فوتك بعافية

FadFadA said...

حسام يحي
في انتظار تشريفك

نورتني

محمد

FadFadA said...

حبيب قلبي
ده سؤال !؟؟؟ ,أكيد بعد أول عيل هدور على فردة الشبشب التانية

95 % ??????
كتييييير قوي
ممكن يكون 93 % بس اللي صح
:)
صدقني مش أنا
و عشان أثبتلك , أنا عندي غاز في البيت
و بالنسبة للأسانسير , من الواضح انك بركة , و احد ابن حلال كسر المفتاح جواه , فأصبح الأسانسير شغال من غير مفتاح

و بالنسبة لجاري , لأ طبعا ماعزلش , بس بيسلم عليك و بيقولك هيجيلك زيارة قريب

و بالنسبة لفوتك بعافية
عافيتك معاك

صحيح ... نسيت أسألك
انت ميييييين ؟؟؟

محمد

FadFadA said...

حبيب قلبي
ماقلتليش إنت مين ؟
أصلك طلعت بركة بجد
ربنا استجاب لدعاءك و جاري عمل مقابلة في شركة تانية و اتقبل
و هينقل هناك خلال يومين
يابن الذيييييين
بس تخيل إني هفتقده و هفتقد مقالبه

محمد

Anonymous said...

هههههههههههه
طيب خد دي
يا رب الاساسنسير يطلع لغاية الدور بتاعكوا أو على الأقل تنزل في دور اوطى

كمان قبل ما انسى:يارب يردموا الحفرة إللى في اول شارعكوا عشان بجد دي كارثة

انا مين!!!!! انت مش عارف
أنا حبيب قلبك

Anonymous said...

على فكرة انا عرفت فردة الشبشب فين
أكيد هي مخبيا الفردة لزوم الطوارئ
رجعت متأخر.... مجبتش اللبس إللي هي عوزاه.... مغسلتش الطباق... ما طبختش
وهكذا

بالنسبة للغاز فعلا ما اختدش بالي... بس كويس على الأقل مش هترجع يوم من غير متلاقي أكل بعد يوم طويل من العمل قرب المغرب .... ومراتك تبصلك بابتسامة عريضة.... الانبوبة خلصت يا حبيبي... ومش هنعرف نغيرها غير بكرة
تقوم ساعتها تكره اليوم اليوم إللي اتجوزت فيه


فوتك بعافية

FadFadA said...

حبيب قلبي
الأسانسير يطلع لغاية عندي ؟؟؟؟؟
إممممممممم
مش واسعة شوية ديه

بالنسبة للحفرة ... و الله ما خدت بالي منها قبل كده

إنت مين يا عم الحاج ؟؟؟؟؟؟؟؟؟؟

من الواضح إنك متجوز قديم بما إنك عرفت فين فردة الشبشب

تفتكر ده محتاج أنبوبة عشان يحصل ؟
... لا أظن

عافيتك معاك يا مان

محمد

Anonymous said...

خلاص يا عم كفاية عليك كدة شكلك ابتديت تقلق...... واحشتني من امبارح يا هندسة
ما تخفش الدار امان
وسلملي على المفلطح والمنبطح

Unknown said...

السلام عليكم ورحمة الله وبركاته
يا هندسة حراااااااام عليك

FadFadA said...

حبيب قلبي
سلمتلك على المفلطح و المنبطح
و بيسلموا عليك كتير

صحيح نسيت أسألك
إنت مين برده ؟؟؟

محمد