قابلتهم ... و افتكرت

أرجو أن تقرأ خاطرة ( من أكثر من تحب ؟ ) قبل أن تبدأ
المكان : نادي نقابة المهندسين – أبو الفدا
الزمان : يوم الجمعة 5/1
الوقت : قبل أذان العشاء بقليل
الحكاية
تعالى أبدأ معاك من أول اليوم – و ما تخفش مش هاطول عليك
كنت رايح مشوار من الصبح فقابلت اثنين من حبايبي اللي كنت معاهم في الكلية ما شوفتهمش من كتيييييييييير
بدران و سلاكة , يمكن سلاكة بشوفه كل فترة – بفضل الله – و ده علشان ساكن جنبه , بس بدران – و هو بالمناسبة أكبر مني بحوالي 4 سنين – ما شوفتوش من لما اتخرج من الكلية , يعني حوالي من 7 أو 8 سنين , و لا تتخيل أد إيه كنت سعيد لما شوفته , كنت بجد هاطير من الفرح , بقولك أكتر من 8 سنين ما شوفتوش
المهم ... قضينا اليوم مع بعض و كان اليوم جميل جدا جدا جدا , خاصة اننا قضيته معاهم
و احنا راجعين لقيت سلاكة بيقولي إن فيه مجموعة من أصحابنا اللي كنا مع بعض في الكلية موجودين و متجمعين دلوقتي في نادي نقابة المهندسن منهم ناس كانت مسافرة بره مصر في شغل و نازلين أجازة سريعة – الكلام ده قبل صلاة العشاء بقليل – و اقترح انحنا نروحلهم
بصراحة انا كنت ميت من التعب و بدران كان برده باين عليه انه تعبان جدا , فما كنش عندي استعداد اننا أروح لأي مكان غير بيتنا علشان أنام كويس علشان أروح الشغل ( أنا ماكنتش نايم غير حوالي ساعتين ) , أما بدران قالوا انه هيوصلوا بالعربية و يمشي على طول , و لكن سلاكة أصر و ألح – جزاه الله خيرا و لن أنسى له الجميل ده أبدا – إني أروح معاهم , فاتفقنا اننا نروح و ما نقعدش , يعني نسلم و نمشي على طول
و وصلنا النادي و شوفتهم
كنا 10 من غير ذكر أسماء علشان مش عارف اكتب مين قبل مين , تخيل من ساعة ما اتخرجنا – من أربع سنين – ما قعدتش معاهم ( أصل أنا ندل قوي ) و أخدنا بعض بالأحضان
يا خبر أبيييييييييض , شعور لا يمكن وصفه , حسّيت ساعتها بـ.......... بـ.......... , بجد مش لاقي كلام عارف أوصف بيه الاحساس ده , عارف الخواجة بيجو لما كان بيحاول مع عبدالفتاح القصري و إسماعيل يس انهم يكتبوا الكلمة المشهورة في الفيلم و مش عارفين , نفس الكلام ...مش عارف أجيب حروف توصف الاحساس , أنا فعلا في عرض المجمع اللغوي , على فكرة 3 منا لسه جايين من السفر خارج مصر و هايسفروا تاني ان شاء الله

حسيت بمزيج غريب من الفرح و الحزن و الندم الشجن , خليط عجيب , فرح لإني شوفتهم و قابلتهم بعد كل الفترة ديه , و حزن و ندم على الأيام اللي كان من الممكن أشوفهم فيها و كنت باستندل , و شجن لإني افتكرت
أيام الكلية – لما كنا طلبة – يا ليت الشباب يعود يوما
افتكرت الأيام الجميلة و عدّت أمام عيني بسرعة و كأنها فيلم قديم جميل , افتكرت أساتذتنا ( اتنين من الموجودين و هما أكبر مننا ) و الحاجات الكتير اللي الواحد اتعلمها منهم , افتكرت التالت( من الموجودين ) و هو بيدافع عننا ( أصل صحته كانت كويسة و ده مش أرّ ) , افتكرت الرابع و هو واقف عمال يزعق في الناس علشان يروحوا يخلصوا الشغل المطلوب و في نفس الوقت يبتسم ابتسامته الجميلة , افتكرت الخامس الصوت الجميل اللي كان بيمتعنا بيه و روحه العالية جدا , افتكرت السادس حبيبي اللي بقاله فترة مسافر و رشاقته و اصراره على إنشاد بارودتي , و السابع أصغر واحد فينا في السن و دفعات إعدادي كلها , و التامن دفعتي و حبيبي و نفس القسم بتاعي و فعلا استفدت منه و اتعلمت منه حاجات كتير قوي
رن في ودني ساعتها نشيد و حسيت اننا سامعه , عزي إيماني لفظي قرآني و سلوكي أدب رب رباني , الصدق شعاري في كل أموري لا يرضى أبدا بالزور ضميري , الوهن معيب عار في عرفي في نصرة ديني لا أخشى حتفي , الله مرادي و الذكر عتادي و كلام نبيي فوزي و رشادي
افتكرت النشيد و عبدالله بينشده ( وحشني جدا هو راخر و نفسي أشوفه
افتكرت أيام الانتخابات و وقوفنا أمام اللجنة مستنيين النتيجة و موسى بينشد ( الله أكبر بسم الله ) , افتكرت أيام المسيرات لما كنا بنخرج و نهتف بقلوب شابة قوية : مش هنطاطي مش هانطاطي احنا كرهنا الصوت الواطي ( على فكرة احنا لسه شباب ) , افتكرت أيام ملزمة الامتحانات و المحاضرات و السكاشن
افتكرت لما كنا بنشبك إيدينا في إيد بعض و نرفعها و نقول من قلوبنا في صوت واحد : الله غايتنا – الرسول زعيمنا – القرآن دستورنا – الجهاد سبيلنا – و الموت في سبيل الله أسمى أمانينا
و قعدنا و اكلمنا , و سبحان الله , كل التعب اللي كنت حاسس بيه ما عرفش راح فين !! , كنا جنب النيل و المفروض الدنيا برد جدا , بس والله ما حسّتش بأي برد , فدفء الحب و المشاعر كان بيدفينا ( إيه الكلام الحلو ده !) و لا تتخيل الحب اللي ظهر من الناس لما كانوا بيطمنوا على واحد قال إن عنده مشكلة , كانوا خايفين عليه جدا , حب صادق فعلا
و اطمنا على بعض و عرفنا أحوال بعض و بعد كده سلمنا و مشينا , و سمعت الكلمات ديه بتتردد في أذني : أيا جامعة النور فيك الإخاء فيك المحبة فيك النقاء .. وداعا وداعا أيا إخوتي غدا سوف نأتي غدا نلتقي
أسأل الله عز وجل أنه كما جمعنا في الدنيا على طاعته و حبه أن يجمعنا في الآخرة في مستقر رحمته في جنته , إخواناً على سرر متقابلين , مع نبيه الأمين و صحابته الغر الميامين , و أن يظلنا في ظل عرشه يوم لا ظل إلا ظله , و أن يجمعنا بباقي إخواننا على خير